555 timer oscillator

دايرة المذبذب Square Wave Oscillator

الدايرة دي بنستخدمها عشان نولد اشارة مربعة بتردد معين. الاشارة المربعة بتستخدم في تطبيقات كتير، اشهرها clock تستخدم في الدواير الديجيتال عشان نشغل ال Flip-Flops، وتعتبر مقياس لمدى سرعة الدايرة المنطقية.

نتعرف اﻷول على ايسي ال 555.

الوصف	Pin
بنوصل عليه سالب البطارية، الارضي.	Pin1: ground
لما الجهد على الرجل دي يقل عن تلت Vcc، الخرج بيتحول من Low to High	Pin2: trigger
الخرج من الايسي بيكون اما صفر Low يعني صفر فولت، او High يعني Vcc او 1.	Pin3: Output
بيجبر الخرج يرجع للصفر، لما نحط عليه Low يعني نوصله بالارضي.	Pin4: reset
تستخدم في تعديل مستوى الجهد، بتؤثر على التردد بعيدا عن المقاومة والمكثف، ليها استخدامات محددة.	Pin5: control voltage
لما الجهد على الرجل دي يزيد عن تلتين Vcc، الخرج بيتحول من High to Low	Pin6: threshold
لما الخرج يكون Low الرجل دي بتتوصل بترانزستور متوصل على الارضي، ويستخدم لتفريغ المكثف المشحون.	Pin7: discharge
الجهد الموجب للايسي بيكون بين 5-15 فولت.	Pin8: Vcc

هنلاحظ اننا محتاجين تلت الجهد و تلتين الجهد داخل الايسي، ودا بيجي عن طريق توصيل 3 مقاومات على التوالي بين الجهد الموجب والارضي، فيقسم الجهد تلات اجزاء، مثلا لو 6 فولت، هيتقسم 2 و 4 فولت، تلت ال6 وتلتين ال6. ال3 مقاومات دول قيمتهم لازم تكون زي بعض عشان تقسيم الجهد يكون متساوي، فاختاروها تكون 5 كاوم، ومن هنا جت تسمية الايسي 555، 3 خمسات.

الدايرة

الدايرة فيها مقاومة R1 متوصلة بالجهد الموجب، وداخلة على مقاومة تانية R2 وبعدين مكثف C1. المكثف بيكون متوصل على رجل 2 و6، وبيتشحن عن طريق المقاومتين R1+R2. واحنا عارفين انه الجهد على الرجل 6 لما يزيد عن تلتين، الخرج بيبقا 0. فاحنا هنسيب المكثف يشحن براحته لغاية ما يوصل لتلتين، فنلاقي الخرج بقا 0. فلما الخرج يبقا 0 الترانزستور بتاع التفريغ يشتغل، فالمكثف يلاقي طريق عند الرجل رقم 7 للارضي عشان يفرغ الشحنة فيها. فيقوم يفرغ عن طريق المقاومة R2. يفضل يفرغ لحد ما يوصل عند تلت الجهد، واحنا عارفين انه الجهد على الرجل 2 لما يقل عن التلت، الخرج بيبقا 1. عشان كدة وصلنا الرجل 2 و6 مع بعض، والاتنين بيعتمدوا على جهد المكثف.

الزمن اللي المكثف محتاجه عشان يشحن تلت الجهد هو:

t1 = 0.693 × (R1 + R2) × C1

والزمن اللي محتاجه عشان يفرغ هو:

t2 = 0.693 × R2 × C1

بالتالي الزمن الكلي اللي الدورة بتتكرر فيه هو:

T = t1 + t2 = 0.693 × (R1 + 2R2) × C1

والتردد بتاع الدايرة هو:

f = 1 / T = 1.44 / ((R1 + 2R2) × C1)

دا شكل الموجة وشحن وتفريغ المكثف اللي اتكلمنا عنه من شوية.

الدايرة دي تقدر تطلع ترددات من اول 1 هرتز الى 500 الف هرتز. وممكن نستخدمها في جهاز ال function generator.